#شعر | #دسمان_السبيعي: سوّد الله لحيتي!

للشاعر السعودي القدير دسمان مناحي السبيعي
قصيدة رائعة بكل المقاييس في فكرتها وأسلوبها الانسيابي ،لم يكتنفها التصنع ولم يلامسها الابتذال ، انتشرت بين محبي الشعر، يجسد بها مفهوم الصداقة صدقاً أو زيفاً ، ولمحة ذكية وطريفة من الشاعر حين لام نفسه بقوله "سوّد الله لحيتي" إذ جعل الدعاء بالسواد في اللحية البيضاء وليس في شي آخر :

سوّد الله لحيتي يوم اترجي واتحرَّى
احسب ان عْيال خلق الله تبي تقضي لزومي

مادريت ان الزمان اللي على حْقوقي تجرَّا
كل يوم يْبدّد احلامي ويضعف من عزومي

الرفيج اللي عن ايام الشتا  فيه  اتذرّا
عقّب الرفقه وراه وعارض الخط العمومي

ماكذب من قال في بعض الأوادم لاتورّى
كل ماتحتاج منْه اكثر يبيحنّ العلومي

صاحبٍ ماهو بياقف معْك في سرّا وضرّا
لاتجي قدْمه على المفرق وتاقف له وتومي

ودك انك ماتعَرْفه كود من برّا ل برّا
لاتوغّل في اعماق الناس تذبحْك الهمومي

اللهم اني من اصحاب المقاصيد اتبرّى
جزْت من ضحك الوجيه وجزْت من حب الخشومي

من علامات القيامة في الزمان اللي يِطَرّا
يستدير البوم حر ويستدير الحر بومي